ليه الكواكب مدورة؟؟

عمرك سألت نفسك الكواكب ليه كروية الشكل؟ ليه مش مربعة ؟ أو مستطيلة؟ أو مثلثة؟ أو حتى غير منتظمة؟

إجابة السؤال ده تكمن في كلمة واحدة....الجاذبية!!

في بدايات نشأة الكواكب بأنواعها سواء الغازية منها أو الصخرية.. كانت مجموع عبارة عن غازات وصخور ومعادن منصهرة وغير مستقرة بتزيد كتلتها مع الوقت (برضو بسبب الجاذبية واللي بتخليها تجذب المواد اللي بتسبح حوليها في الفضاء).

زيادة الكتلة مع الوقت سبب زيادة في قوة الجاذبية واللي بتأثر على نقطة واحدة وهي المركز مؤثرة على أطراف الكوكب الخارجية (كما موضح بالشكل). وده اللي بيخلي الكواكب عبارة عن دائرة ثلاثية الأبعاد (كروية).

مصدر الصورة:

https://spaceplace.nasa.gov/planets-round/en/

طيب السؤال دلوقتي..هل كل الكواكب كاملة الأستدارة (كروية الشكل مثاليا)؟

الحقيقة أن في كواكب كاملة الإستدارة (مثالية) زي المريخ والزهرة.

أما باقي الكواكب فكرويتهم غير مثالية وده بيرجع لدورانهم المغزلي حول أنفسهم بشكل سريع الى حد ما وده بيخلي الكوكب متختخ كدة من عند خط أستواءه وأرفع سيكة من عند القطبين وده بيحصل لأي شئ بيلف حولين نفسه بسرعة.. الأجزاء على الأطراف بتلف اسرع من الأجزاء القريبة من المركز مثال للكواكب دي المشترى والأرض.

معلومة على الماشي:

يجي واحد يقولك انت هجاص ياعم .. مش كل حاجة في الفضاء مكورة.. عندك الكويكبات السيارة (Asteroids) والنيازك وبعض الأقمار مش مدورة.. بالعكس دي غير منتظمة بالمرة.. كأنها حتة طوبة عملاقة في الفضاء.

كلامك صحيح.. الكويكبات والنيازك وبعض الأقمار زي قمر فوبوس التابع للمريخ (اللي في الصورة ده) وغيره كتير مش مدورين. والسبب أن كتلتهم أصغر من أنها تسبب قوة جاذبية كافية على المركز عشان تخليه كامل الإستدارة.

مصدر الصورة:

https://assets.cdn.astronomynow.com/wp-content/uploads/2016/10/02144458/Phobos_Stickney-crater_667x500.jpg

المضحك في الموضوع أن فيه حقيقة علمية أسمها (نص قطر البطاطس)

أه والله العظيم أسمها كدة..

الحقيقة دي بتقول أن الكوكب أو القمر لازم يكون نصف قطره من 200 ل 300 كم عشان ياخد الشكل الدائري المنتظم. أقل من نصف القطر ده الكوكب أو القمر أو غيرهم هيكون شكله غير منتظم شكل حبة البطاطس.. 

عشان كدة سموا النظرية دي بإسم نصف قطر البطاطس.

والى بطاطسايا أخرى ...

قصدي والى موضوع  أخر إن شاء الله..

اتمنى يكون الموضوع عجبكم..

لو حابين تعرفوا عن أي موضوع..أو حبيتوا أكتب عن موضوع معين.. ياريت تكتبوه في الكومنت.

شادي القصاص

المصدر:

https://spaceplace.nasa.gov/planets-round/en/