كون في ذرة

"انا الكون للذرة.. أنا ذرة في الكون..."

تلك الكلمات –والتي قالها عالم الفيزياء العبقري ريتشارد فاينمان-دائما ما تشغل بالي..وتفكيري

فمع عظمة هذا الكون بشموسه وكواكبه ومجراته..وضعفنا وقلة حيلتنا والتي نشعر بها حين نقارن انفسنا بهذا الكون الخلاب..وضئالتنا احيانا حين ندمر انفسنا كطفل يلعب بالكبريت لأول مرة..فأحرق بيته..وخرب الأرض..وملأها حروب ودمار..ليس فقط في نفسه بل في بيئته وموارده..

مع كل هذا الضعف البشري والطفولة الانسانية..والتي يعاني منها التاريخ الى الان ..الا اننا نحمل من العظمة مايحمله هذا الكون من قوة خلاقة..بنائة.. فنحن جزء منه وهو جزء منا..

تلك القوة الكامنة..قادرة على البداية من جديد..قادرة على النجاح...وتحقيق العدل والسلام للانسانية...حينها..سيكون الانسان قد تعدى مرحلة الطفولة التاريخية..وبدأ مرحلة النضوج البشري...

اخترت اليوم موضوعا ليس بالسهل ابدا..واعتبرته تحدي ..وذلك ليس فقط لانه موضوع في الفيزياء دقيق وصعب التخيل..بل ايضا..لانه للقارئ الغير متخصص..وهذا هو سر التحدي...

النهاردة هنتكلم عن وحدات الكون...هنتكلم عن المادة...ووحداتها ...لحد مانقتحم عالم الذرة ...وما هو اصغر من الذرة كمان...

هو فيه حاجة اصغر من الذرة؟؟؟  كمل وانت تعرف  !!!!

الكون حاوليك بيتكون من مواد مختلفة....وكلمة مادة يعني اي شيء ليه كتلة وليه حجم...

مثلا..الزجاج والخشب..مادة...والمياه مادة..والهوا برضو مادة...

لو خدت بالك هتلاقي ان المواد بتتقسم الى 3 انواع أو اشكال رئيسية...صلبة وسائلة..وغازية.. (فيه نوع رابع اسمه بلازما-اركنه دلوقتي على جنب)

المواد اللي بتشوفها حواليك..ممكن تكون مواد نقية او مخلوطة...

النوع الأول: المواد النقية Pure Matter   

دي بتقى ثابتة مابتتغيرش بسهولة...ودي ممكن تكون مواد نقية متجانسة من عنصر واحد Element ..زي الاكسجين..الحديد...النحاس...او مادة نقية مركبة. Compound...زي المياه..وغاز ثاني اكسيد الكربون اللي بيطلع في الزفير ...

اي مادة نقية (مركب)  صعب جدا تفصل مركباتها الى بعمليات كيميائية معقدة...

زي مثلا المياه..فيها اوكسجين وهيدروجين..مش سهل انك تفصلهم عن بعض الا بتفاعل كيميائي...غاز ثاني اكسيد الكربون اللي بيطلع في التنفس...منقدرش نفصل الكربون عن الاكسجين الا بتفاعل كيميائي..

النوع الثاني من المادة هو المخلوط.  Mixture.

وده سهل فصل مكوناته بدون عمليات كيميائية...زي ملح ومياه...ده محلول (مخلوط)...بخر المياه ...يفضل الملح ...سكر ورمل...حطهم في مية...هيدوب السكر...والرمل يفضل تحت...صفيهم....وبخر المياة...يجيلك السكر....والسهولة في الفصل دي عشان المواد المخلوطة مش مرتبطة كيميائيا...دول بس محطوطين على بعض..

طيب ادينا عرفنا المادة بنوعيها...النقي والمخلوط....المادة دي بتتكون من ايه؟؟؟

المادة ياسيدي عاملة زي الحيطة ...لو كسرت الحيطة هتلاقي طوب...مرصوص فوق بعضه...نفس الحكاية في المادة...المادة بتتكون من جزيئات ...مرصوصة جنب بعض...لو الجزيئات دي لزقة كويس في بعض..تبقى المادة صلبة...لو مش لزقة اوي...تبقى سائلة وبتتشكل بسهوله....لو اللزقة ضعيفة اوي ...تكون غاز...بيروح ويجي...(من غير مليجي ..خلينا جد شوية :)  بكل سهولة بدون قيود...

طيب اللزقة دي ايه اللي يحدد قوتها او ضعفها....اللي يحدد ده..المكون الاصغر للجزيئات...وهو الذرات وارتباطها ببعض..والذرة هي اصغر وحدة للمادة.(.يعني اصغر جزء متماسك وثابت).بس مش اصغر مكون في المادة...في اصغر من الذرة...

يبقى عشان ماننساش...الكون بيتكون من مواد...المواد بتتكون من جزيئات...والجزيئات بتتكون من ذرات...طب الذرات بتتكون من ايه!!!!

الذرة بتتكون من 3 جسيمات مختلفة...وهم الالكترون...والبروتون...والنيوترون..

عشان نفهم شكل الذرة...افتكر شكل الكواكب اللي بتلف حوالين الشمس

الالكترون شحنته سالبة...وبيلف في مسارات دائرية –زي الكواكب- حوالين النواة. والنواة دي بقى هي اللي فيها الاخين التانيين البروتون والنيوترون...

البروتون موجب الشحنة..اما النيوترن مالوش شحنة...كمالة عدد عشان يدي وزن للنواه..

وبما ان الالكترون سالب...والبروتون موجب...فعددهم في الطبيعي بيكون متساوي...عشان كدة مبنتكهربش ...واي خلل في التوازن ده بيعمل شحنة زايدة...

طيب ليه الالكترون ماينجذبش للنواه الموجبة دي...(وده موضوع اركنه برضو على جنب شوية).

طيب ايه اللي يخلي الجسيمات دي مختلفة عن بعض في الشحنة والوزن...اكيد في حاجة جواهم هي اللي عاملة الاختلاف ده.....

ده موضوع المقال اللي جي...لو حبيتو نكمل..

الكون عظيم.....عظيم في كبره..وعظيم في صغره...

انت جزء من الكون العظيم ده...انت قيمة...

عشان كدة مختلف عن اي حد..واختلافك عن غيرك مش صدفة

انت مختلف عشان اللي هتقدمه للبشرية...مختلف...دورك مهم..صغير كان او كبير

كلنا مكونين من نفس الذرات والجزيئات والمواد....بس الروح هي اللي بتخليك.......

انسان..

تعليقاتكو تهمني...ورأيكوا برضو يهمني...سلبا او ايجابا....

وللحديث بقية....اذا كان في العمر بقية..

شادي القصاص