حياة وموت النجوم

هنتكلم النهارده عن حياة وموت النجوم...ماتستغربش!!!!

النجوم بتتولد وتعيش وتموت زينا بالظبط...

تعالوا الأول نعرف معلومات عامة عن النجوم قبل مانندخل في حياتها وموتها...

النجم هي كرة ضخمة من الغاز مضغوطة ودرجة حرارتها هائلة جدا..

النجوم بتتكون عن طريق تجاذب الغبار الكوني اللي معظمه من الهيدروجين –ابسط العناصر الكونية-وبالتجاذب ده يزيد الضغط...وبزيادة الضغط..تزيد الحرارة وده اللي بيحصل لما بتفرك اديك في البرد.. ومع زيادة الحرارة...يندمج الهيدروجين مع بعضه..ويكون هيليوم وطاقة حرارية وضوء..

الشمس اقرب النجوم للأرض..وهي تبعد حوالي 150 مليون كم..وضوء الشمس بيوصل الأرض بعد 8 دقايق...ياعني حضرتك لما بتبص للشمس ...بتشوف الشمس من 8 دقايق.. تخيل بقى ان فيه نجوم بتبعد عنك الاف السنين الضوئية...ياعني لو حد بيبص على الأرض بتيلسكوب هناك...ممكن يشوف الديناصورات...لان الضوء اللي لسة وصله بعيد جدا.

في مجرتنا درب التبانة – واللي هي مجرة صغيرة اوي- في اكتر من 100 بليون نجم..وتخيل بقى ان فيه اكثر من 170 بليون مجرة تم حصرها في الكون اللي تم رؤيته لحد النهارده.. خلي بالك..الرقم الأخير ده مش عدد النجوم في الكون المرئي..ده عدد المجرات !!!!!!!

واللي مجرتنا تعتبر اصغرهم..يعني بحسبة بسيطة تقدر تقول ان الكون المرئي في من سيبتليون نجم Septillion..معلش رقم اسمه غريب شويه...لأنه عبارة عن 1 وجنبه 24 صفر......انبهرت ولا لسه؟؟؟!!!!!!!

والنجوم ليها انواع واحجام والوان كتيرة جدا....والأنواع دي شرحها مخطط بياني في الفيزياء الفلكية Astrophysics واللي عمله اتنين من عباقرة الفيزياء الفلكية وهم هرتزشبرنج و رسل واللي الرسم البياني ده متسمي باسمهم.  H-R Diagram  سنة 19000 م

الرسم البياني العبقري ده عمل علاقة بين حرارة النجوم ولمعانها.

والمخطط ده قسم النجوم كلها الى 3 مجموعات رئيسية (او مجموعات تطورية) لأن المخطط البياني ده كمان بيتتبع تطور النجوم مع الزمن.

المجموعة الأولى: اسمها المجموعة الرئيسية..  Main Sequence Starsواللي معظم نجوم الكون تندرج تحتها..وهي في الرسم بتبدأ من اقصى اعلى اليسار (نجوم شديدة الحرارة) الى اسفل يمين الرسم (نجوم ابرد وأقل لمعانا).. واللي شمسنا الجميلة تنتدرج فيها..(منتصف المنحنى). المجموعة دي هي في مرحلة الشباب والعنفوان لأن 90% من حياتها بتقضيه في اندماج الهيدروجين-ابسط العناصر في الكون- والمكون الاساسي للغبار الكوني..وباندماج الهيدروجين..بينتج الهيليوم ومعاه طاقة حرارية وضوء.

المجموعة الثانية:وهي النجوم الحمراء والزرقاء العملاقة Giant and Supergiant Stars واللي موقعها في الرسم فوق  المجموة الرئيسية. والنجوم دي اكبر من الشمس بكتير..وهي نجوم كبيرة في العمر بتمتاز بضخامتها ولمعانها بس حرارة سطحها قليلة..وده لأن الهيدروجين اللي في مركزها قل جدا فبدأ يعمل اندماج للهيليوم والعناصر الأثقل..ودي مرحلة الأحتضار للنجم.

المجموعة الثالثة: وهي الأقزام البيضاء White Dwarfs  وهي اسفل يسار المجموعة الرئيسية في الرسم ودي اخر مرحلة  للموت النجوم متوسطة الحجم..يعني نهاية شمسنا الجميلة..ودي نجوم ميتة..حرارتها كبيرة بس ضوئها خافت بسبب صغر احجامها.

كل ماكبر النجم في الحجم...كل مانهايته بتبقى سريعة وعنيفة..لأن كبر الحجم معناه حرق اكبر واسرع جوة نواة النجم.

النجوم المتوسطة –زي شمسنا الجميلة- بتعيش كتير وبعد مابتخلص الوقود النووي في نواتها..بتتحول لعملاق احمر...وبعدين قزم ابيض خافت...هينور كأنه قمر في ليل طويل مالوش نهار...

النجوم العملاقة لما تخلص وقودها النووي..بيختل توازنها ....وتنفجر انفجار ضخم..بيسمى سوبرنوفا...Supernova   والانفجار بينتج عنه غبار كومي مهول واشعاعات تصل لملايين الكيلومترات...وخلف الغبار ده..بتفضل نواه النجم العملاق بتلف بسرعة رهيبة حولين نفسها..فيما يسمى بالنجم النيتروني..Neutron Star  وده من اغرب الموجودات الكونية غرابه.. تخيل مدينة قد القاهرة واسكندرية انضغطوا في كرة لا يتجاوز قطرها 20 كم ...وبتلف بسرعة 300 لفة في الثانية...شئ مخيف ومذهل..

اما النجوم الاكبر من عملاقة ..Super Giants  فموتها اشد عنفا وغرابة..لأنها بعد مالوقود بينتهي ..وتدمج العناصر الأثقل من الهيدروجين والهيليوم والكربون وغيرهم...يختل توازنها..وتنفجر انفجار اضخم من السوبر نوفا...بيسمى هيبرنوفا.. Hypernova  وخلف الأنفجار ده...يقبع وحش الفيزياء ...وأغرب موجود حير علماء الفيزياء وهو الثقب الأسود...BlackHole  وده موضوع  المقال القادم لو حبيتو نكمل قصة الكون الممتعة...

طولت عليكوا...

وللحديث بقية اذا كان في العمر بقية....

اذا عجبك المقال...شارك بيه براحتك...العلم للجميع..

أسئلتك ورأيك يهموني...شارك بأسئلتك ورأيك في كومنت.....

شادي القصاص